رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تراجع مفاجيء للدهب، وبعثة صندوق النقد في مصر، وطريقة جديدة لمعرفة مخالفات المرور.

والبداية من سوق الصاغة.. اللي شهدت تراجع واضح في أسعار الذهب سواء جوّه مصر أو عالمياً خلال تعاملات يوم الخميس، في وقت السوق كله واقف مترقّب اجتماع الفيدرالي الأمريكي والقرار اللي هيحدد مصير الفايدة، وده حسب تقرير منصة “آي صاغة” لتداول الدهب والمجوهرات.

ارتفاعات محدودة في أسعار الذهب.. وعيار 24 يتخطى 6300 جنيه

وزير الاستثمار لبعثة صندوق النقد الدولي: الاقتصاد المصري يواصل السير في الاتجاه الصحيح

وقال سعيد إمبابي، المدير التنفيذي لـ”آي صاغة”، إن أسعار الدهب في السوق المصرية نزلت حوالي 15 جنيه عن نهاية تعاملات امبارح، ووصل جرام 21 لـ حوالي 5600 جنيه، وفي المقابل الأونصة العالمية هبطت حوالي 20 دولار ووصلت لـ 4190 دولار.

أما جرام 24 فسجّل حوالي 6400 جنيه، وعيار 18 حوالي 4800 جنيه، وسعر الجنيه الدهب فضِل ثابت عند 44.8 ألف جنيه.

والتقرير وضّح إن الهبوط ده بييجي في وسط حالة ترقّب قبل اجتماع لجنة السياسة النقدية في الفيدرالي الأسبوع الجاي، خصوصاً إن الدهب بيتحرك في نطاق ضيق بعد ما كان وصل لأعلى مستوى ليه من 6 أسابيع بس.

ونروح لوزير الاستثمار والتجارة الخارجية حسن الخطيب اللي استقبل بعثة صندوق النقد الدولي ضمن المراجعة الخامسة والسادسة لبرنامج التعاون بين مصر والصندوق. اللقاء كان فيه مناقشة لأهم التطوّرات الاقتصادية والإصلاحات اللي الدولة شغالة عليها سواء مالياً أو مؤسسياً أو تجارياً.

الخطيب أعرب خلال الاجتماع عن تفاؤله بمسار المراجعتين، وأكد إن الاقتصاد المصري ماشي في الاتجاه الصح، وإن في مؤشرات كتير طلعت أحسن من المتوقع وفق البرنامج المتفق عليه مع الصندوق، وده بيوضّح قد إيه الإجراءات اللي الدولة أخدتها الفترة اللي فاتت كانت قوية وقدرت تحقق نتائج واضحة.

وأشار الخطيب إن الحكومة ماشية برؤية إصلاحية واضحة، معتمدة على سياسات منضبطة بتقوّي استقرار الاقتصاد الكلي، وبتفتح مساحة أكبر للقطاع الخاص إنه ينمو، مع التركيز على تحسين بيئة الاستثمار ورفع كفاءة منظومة التجارة باعتبارها عنصر مهم في معادلة النمو.

ونروح لوزارة الاتصالات وتكنولوجيا المعلومات، حيث أعلن الدكتور عمرو طلعت إن الدولة نفّذت مشروع استراتيجي لربط كل إدارات المرور التابعة لوزارة الداخلية بالنيابة العامة، وده هيتيح للمواطن إن موقف مخالفاته يتراجع إلكترونياً في اللحظة من غير ما يحتاج يطلع “شهادة براءة ذمة”، وده بداية من يوم الأحد.

وأوضح وزير الاتصالات على هامش افتتاح وتفقد عدد من المشروعات التكنولوجية في محافظة الدقهلية إن المواطن مش محتاج يقدّم أي ورق لما ييجي يجدّد رخصة عربيته، لأن كل بيانات المركبة والمخالفات بتظهر مباشرة على شاشة موظف المرور لحظياً، وقال إن المشروع ده اتنفّذ بالتعاون مع وزارة الداخلية والنيابة العامة.

وأضاف الدكتور عمرو طلعت إن الخطوة دي تعتبر نموذج عملي لفكرة الحكومة التشاركية اللي من غير ورق، وتعكس فلسفة التحول الرقمي اللي بتقوم على إن المواطن مايبقاش مطلوب منه يجيب ورق من جهة حكومية علشان يقدّمه لجهة حكومية تانية، بل بالعكس.. يبقى في تبادل بيانات مباشر وآمن بين الجهات الحكومية نفسها.

facebook

twitter

whats

• الذهب
• اسعار الذهب
• سوق الصاغة
• مخالفات المرور
• الفيدرالي الأمريكي
• صندوق النقد الدولي