هو ايه اللي بيحصل في سوق الدهب ؟وليه بعد موجة صعود قوية خلت ناس كتير ترجع تحسبها على اسعار أعلى فجأة نشوف هدوء وتراجع في الساعات الاخيرة؟ وهل اللي بيحصل ده بداية تصحيح طبيعي ولا مجرد استراحة قصيرة قبل موجة جديدة؟ وايه اللي المستثمر والمواطن العادي لازم يفهمه من المشهد ده كله؟

اللي حصل في سوق الدهب خلال الساعات اللي فاتت ان الاسعار بدأت تهدى وتنزل شوية بعد طلوع قوي وسريع وده حصل بسبب حاجة اسمها جني ارباح بمعنى ان ناس كتير اشترت الدهب من مستويات اقل ولما شافت الاسعار طلعت بقوة قررت تبيع وتحقق مكسب سريع وده سلوك طبيعي جدا في اي سوق مالي سواء دهب او اسهم او عملات ومع اول موجة بيع الاسعار بتاخد نفس وتهدى شوية.

انخفاض أسعار الذهب في السوق المصري اليوم الخميس وسط توترات فنزويلا

بنك HSBC يتوقع وصول سعر الذهب إلى 5000 دولار للأونصة في النصف الأول من 2026

الدهب في السوق المصري نزل بحوالي خمسة وخمسين جنيه في الجرام الواحد لعيار واحد وعشرين واللي يعتبر العيار الاكتر تداول في الشارع المصري ووصل لحوالي خمسة الاف تسعمية وخمسين جنيه وده بعد ما كان قريب من ستة الاف جنيه في ساعات قليلة والدهب عيار اربعة وعشرين سجل حوالي ستة الاف وتمانمية جنيه وعيار تمنتاشر حوالين خمسة الاف ومية جنيه والجنيه الدهب فضل محافظ على مستوى قريب من سبعة واربعين الف وستمية جنيه.

التراجع ده مرتبط بشكل مباشر اللي بيحصل عالميا لان الاونصة نفسها نزلت بحوالي تسعة واربعين دولار ووصلت لحوالي اربعة الاف وربعمية خمسة واربعين دولار وده حصل مع بداية تعاملات الاسواق الامريكية نتيجة عمليات بيع سريعة من متداولين العقود الاجلة اللي بيشتغلوا على المدى القصير وبيخرجوا اول ما يشوفوا مكسب مناسب.

بس المهم هنا ان التراجع ده لحد دلوقتي محدود جدا ومفيش اي علامات على كسر اتجاه صاعد قوي لان الطلب على الدهب لسه موجود وبقوة والسبب الرئيسي هو استمرار التوترات الجيوسياسية عالميا وعدم وضوح الرؤية الاقتصادية في اكتر من منطقة في العالم وده دايما بيخلي المستثمرين يرجعوا للدهب كملاذ امن حتى لو حصلت تصحيحات قصيرة.

كمان في عامل مهم جدا وهو توقعات السياسة النقدية الامريكية لان السوق مازال بيراهن على ان البنك المركزي الامريكي هيبدأ يلين السياسة النقدية خلال الفترة الجاية ومع اي اشارة لتقليل الفايدة او تثبيتها لفترة اطول الدهب بياخد دعم مباشر لان تكلفة الفرصة البديلة بتقل وده بيخليه جذاب اكتر.

اللي بيحصل دلوقتي نقدر نقول عليه حركة صحية جدا للسوق لان الصعود السريع من غير تصحيح دايما بيكون خطر لكن لما السوق يطلع وبعدين يهدى شوية ويجمع قوى ده بيبقى مؤشر ان الاتجاه الصاعد لسه قائم وان في مشترين مستنيين مستويات اقل للدخول من جديد.

التوقعات للايام الجاية بتميل ان الدهب يتحرك في نطاق عرضي مائل للصعود بمعنى انه ممكن نشوف تذبذب وطلوع ونزول بسيط لكن اي هبوط بيقابله طلب شراء خصوصا من الناس اللي شايفة ان الدهب لسه عنده مساحة للارتفاع على المدى المتوسط مع استمرار الضغوط العالمية وعدم اليقين الاقتصادي.

وعشان كده اللي لازم نفهمه ان التراجع الاخير مش نهاية الموجة الصاعدة لكنه جزء طبيعي من حركة السوق والدهب لسه محتفظ بعوامل دعم قوية سواء من السياسة النقدية العالمية او من المخاطر الجيوسياسية او من شهية المستثمرين اللي بيدوروا على امان في وقت العالم كله فيه متغيرات سريعة ومفتوحة على كل الاحتمالات.

facebook

twitter

whats

• الدهب
• سوق الدهب
• الأسواق الأمريكية
• التوترات الجيوسياسية