مصر داخلة عصر جديد من الطاقة الخضراء بتحويل زيت القلية لوقود طيارات، بس إزاي زيت الأكل اللي كنا بنرميه هيبقى وقود يطير بيه أكبر الطيارات في العالم؟، وهل المشروع ده ممكن يخلي مصر مركز عالمي لإنتاج الوقود المستدام في المنطقة؟، وهل التقنية الجديدة دي هتأثر على أسعار الوقود أو توفر فرص عمل جديدة؟، وهل هنشوف قريب مطارات مصر كلها بتستخدم وقود طيران صديق للبيئة؟

في خطوة تعتبر نقلة حقيقية في الصناعة والطاقة في مصر، وزارة البترول أعلنت عن مشروع من الآخر، نقدر نقول عليه مشروع “المستقبل”.. لأول مرة في مصر هيتم تحويل زيت الأكل المستعمل لوقود طيارات حقيقي ومستدام، يطير بيه أكبر الطيارات في العالم.. وده مش كلام، ده مشروع وقعوا عليه رسميًا قدام كبار قيادات قطاع البترول والشركات العالمية.

5 شركات عالمية تتنافس على محطة رياح جبل الزيت.. والسر في الطاقة المتجددة

أول مشروع من نوعه.. وزير البترول والثروة المعدنية يشهد توقيع عقد رخصة إنتاج وقود الطائرات المستدام

القصة بدأت لما المهندس كريم بدوي وزير البترول حضر توقيع عقد رخصة الإنتاج بين الشركة المصرية القابضة للبتروكيماويات، والشركة المصرية لإنتاج وقود الطائرات المستدام ESAF، وبين شركة Honeywell UOP الأمريكية، واحدة من أكبر الشركات اللي عندها خبرة وتقنيات عالمية في تصنيع الوقود الأخضر.

الموضوع مش بس توقيع ورق وخلاص، ده شراكة كبيرة بيشارك فيها قيادات مهمة زي المهندس إبراهيم مكي رئيس الشركة القابضة للبتروكيماويات، وخالد هاشم المدير التنفيذي لهانيويل في الشرق الأوسط وأفريقيا، وغيرهم من قيادات القطاع.. ولما تلاقي كل الأسماء دي في حدث واحد، يبقى الموضوع مش بسيط، ده مشروع استراتيجي بجد.

بعد التوقيع، الوزير كريم بدوي طلع بتصريح مهم جدًا وقال إن المشروع ده هو الأول من نوعه في مصر، وده معناه إننا داخلين عصر جديد من الطاقة النظيفة والتحول الأخضر.. وقال كمان إن المشروع ده هيقلل انبعاثات الطيران بشكل ضخم، لأن المصنع الجديد اللي هيكون في الإسكندرية هيحوّل زيت الطعام المستعمل لوقود طيارات بطاقة إنتاجية بتوصل لـ 120 ألف طن سنويًا.

تخيل أن الزيت اللي بنرميه بعد القلية، هيبقى وقود طيارات؟ مش بس كده، المشروع ده لوحده هيقلل حوالي 400 ألف طن من انبعاثات ثاني أكسيد الكربون كل سنة، وده رقم ضخم بيفرق في البيئة وفي صورة مصر قدام العالم.

ومن جهة تانية، خالد هاشم من شركة هانيويل أكد أنهم فخورين بالشراكة دي، وإن مصر فعلاً ماشية في طريق عالمي ومحترم ناحية الطاقة النظيفة.. وقال إن الشركة هتوفر أحدث تقنياتها علشان المشروع يطلع بأعلى جودة ومعايير دولية.

الجميل إن تقنية Honeywell تعتبر من أقوى التكنولوجيات على مستوى العالم في تصنيع الوقود المستدام، وكمان عندها معدل تحويل عالي يوصل لـ 80% من زيت الطهي لوقود مطابق لمواصفات الطيران العالمي.

يعني من الآخر، احنا قدام مستقبل جديد للطاقة في مصر، ومشروع بيجمع بين الاقتصاد والبيئة، وهيحط مصر على خريطة الدول اللي بتنتج وقود طيران صديق للبيئة.. والأجمل أنه معمول بزيت الأكل.

facebook

twitter

whats

• زيت الطعام
• وقود طائرات
• صناعة الوقود المستدام
• الطاقة الخضراء
• أسعار الوقود