تخيل تصحى الصبح، تمسك موبايلك، تفتح تطبيق البنك على السريع، فجأة تلاقي حاجة غريبة.

رصيدك ناقص، في عملية خصم إنت ما عملتهاش، أو الأسوأ  الحساب فاضي!
تيجي تقول يمكن غلطة؟.. ولا ممكن يكون احتيال؟

أبو السعود: رفع وعي العملاء وتأهيل الكوادر المصرفية خط الدفاع الأول لمواجهة جرائم الاحتيال

الحكومة تحذر من الاحتيال الإلكتروني وتكشف أبرز طرق حماية البيانات الشخصية (فيديو)

في حالات كتير بيبدأ الموضوع بخصم صغير جداً،  100 جنيه و 200 جنيه، وتقول مش مشكلة، لكن الحقيقة؟..

أوقات ده بيكون اختبار من نصّاب علشان يشوف الحساب شغال ولا لأ!
خلينا عارفين أن مشاكل الحسابات البنكية ممكن تحصل لأي حد، وفي أي وقت، ممكن تبقى حاجة بسيطة زي إن البطاقة مش شغالة، أو الماكينة رفضت تسحب.

وممكن الموضوع يبقى أكبر، خصم مش مفهوم،  حركة مالية غريبة، أو الحساب اتجمد فجأة من غير إنذار، وساعات محاولة احتيال أو استخدام غير مصرح بيه لبطاقتك.

طيب تتصرف إزاي؟ أهم حاجة ما تتوترش، لأن في خطوات واضحة تقدر تمشي عليها وتحافظ على فلوسك.

أول خطوة: التليفون.. قبل ما تنزل تجري على الفرع وتضيع وقتك في الطوابير، اتصل بخدمة العملاء وخليهم يعملوا إيقاف مؤقت للبطاقة لو شاكك في عملية مش بتاعتك.. كل بنك في مصر عنده رقم شغال 24 ساعة.

مثلاً: في البنك الأهلي المصري الرقم 19623، وفي البنك التجاري الدولي (CIB) الرقم 19666.. وإنت بتكلمهم… خليك واضح ومباشر، قول: في مبلغ اتخصم يوم كذا ومش عارف ليه.. أو البطاقة مش شغالة ومفيش سبب واضح، أو الحساب اتجمد فجأة وعايز أعرف السبب.

في حالات كتير، المشكلة بتتحل في نفس المكالمة، خاصة لو كانت حاجة فنية.

طيب لو ما اتحلتش؟ لو قالولك لازم تروح الفرع.. شوف أقرب فرع، اتأكد من مواعيد العمل، وخد معاك بطاقتك الشخصية.

وطبعاً أي دليل: كشف حساب فيه الخصم، سكرين شوت من التطبيق، رسائل SMS، أو إيصالات.

ولما توصل  اشرح كل التفاصيل بهدوء، ولو حسيت إن الموضوع أكبر من الموظف من حقك تطلب مدير الفرع.

دي فلوسك… ومن حقك تعرف إيه اللي حصل وتحصل على حل واضح وسريع.

وخليك فاكر: التحرك السريع بيمنع خسارة أكبر، وإنك تبلغ بدري ممكن ينقذ حسابك.

facebook

twitter

whats

• البنك
• تطبيق البنك
• احتيال
• الحسابات البنكية
• مشاكل الحسابات البنكية