مصر عاملة خطة قوية عشان تقدر تضيف قدرات جديدة من الطاقة الشمسية والرياح، بس هل بطاريات تخزين الطاقة هتغير شكل شبكة الكهرباء عندنا؟، وقد إيه الخطة الجديدة هتوفر من استهلاك الغاز والوقود التقليدي؟.. وإمتى هنشوف أول محطة تخزين طاقة شغالة على أرض الواقع؟، وهل شبكة الكهرباء الحالية مستعدة لاستقبال 16 جيجاوات إضافيين من الطاقة المتجددة؟

واضح إن وزارة الكهرباء داخلة على مرحلة جديدة ومختلفة تمامًا في ملف الطاقة، وملف كمان مهم جدًا لمستقبل البلد.. الدكتور محمود عصمت، وزير الكهرباء أعلن عن خطة عاجلة وقوية لإضافة قدرات كبيرة من الطاقة الشمسية وطاقة الرياح، وكمان لأول مرة في تاريخ مصر هيتم استخدام بطاريات تخزين الطاقة عشان نقدر نعتمد أكتر على مصادر الطاقة النظيفة بدل الوقود التقليدي.

أول مصنع لإنتاج بطاريات تخزين الطاقة في مصر.. خطة الدولة للانتشار العالمي برعاية الصين

توطين صناعة بطاريات تخزين الطاقة في مصر.. وأسرار قرار الحكومة بتثبيت أسعار الأسمدة

الفكرة ببساطة أن الدولة عايزة تقلل استهلاك الغاز والسولار في محطات الإنتاج، وتستغل الشمس والهواء اللي عندنا بوفرة، وده مش بس بيوفر تكلفة ضخمة ده كمان بيحسن من استقرار الشبكة وكفاءة التشغيل.

وزارة الكهرباء شغالة حاليًا على مشروعات كتير جدًا لإنتاج الكهرباء من مصادر متجددة، سواء محطات ريح جديدة أو توسعات في الطاقة الشمسية، بالإضافة لمنظومات التخزين اللي هتكون عنصر أساسي في المرحلة الجاية.. طيب ليه؟، لأن الطاقة الشمسية والرياح ساعات بتكون متذبذبة، فالاعتماد على بطاريات تخزين الطاقة (BESS) هيضمن إن الطاقة اللي بتتولد متضيعش وتتخزن للاستخدام وقت الحاجة.

الخطة الحالية بتستهدف إضافة أكتر من 16 جيجاوات طاقة متجددة جديدة، وده رقم ضخم جدًا، وكمان أكتر من 3000 ميجاوات ساعة من أنظمة التخزين قبل سنة 2030! وده معناه أن الضغط على الوقود الأحفوري هينخفض بشكل كبير.

وكمان الوزارة شغالة على تطوير الشبكة القومية لنقل الكهرباء، ودي خطوة مهمة جدًا، لأن مهما أنتجنا طاقة لو الشبكة مش مستعدة مش هنعرف نستفيد منها… عشان كده في تعاون مع بيوت خبرة دولية لتقييم الشبكة ومعرفة إزاي نقدر ندمج القدرات الجديدة من الطاقة المتجددة من غير ما الشبكة تتأثر أو يحصل فقد.

الوزير كمان اتكلم عن برنامج “أفق أوروبا” وقال إنه واحد من أهم الأدوات اللي بتساعد مصر مش بس في التمويل، لكن كمان في تبادل الخبرات والتكنولوجيا، ودعم الابتكار، وتطوير الكوادر البشرية المصرية، وده مهم عشان أي تحول للطاقة النظيفة لازم يكون قائم على علم وخبرة وتدريب.. وأكد أن التحديات اللي العالم كله بيواجهها من مناخ وطاقة وتكنولوجيا محتاجة شغل جماعي، ومصر وأوروبا لازم يكملوا الطريق مع بعض في التعاون ده.. ودعا كل الشركاء إنهم يعظموا الاستفادة من البرنامج عشان يطلع منه مشروعات حقيقية تخدم الشعب وتحقق تنمية مستدامة.

يعني من الآخر، مصر داخلة مرحلة طاقة جديدة تمامًا، مبنية على الشمس والهواء والتكنولوجيا، وبتستعد تكون من الدول القوية في الطاقة النظيفة خلال السنين الجاية.

facebook

twitter

whats

• الطاقة الشمسية
• الطاقة الشمسية والرياح
• بطاريات تخزين الطاقة
• استهلاك الغاز والسولار
• وزارة الكهرباء