رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، طفرة متوقعة في انتاج الغاز، وانتعاش في مبيعات السيارات، وشركة ألمانية تفتتح مصنعاً في مصر. 

والبداية من وزارة البترول.. اللي اتفقت مع الشركات الأجنبية على حفر 26 بيرا استكشافية للتنقيب عن النفط والغاز الطبيعي خلال أول 3 شهور من 2026.

بنك التسويات الدولية يحذر من المضاربة في الذهب مع قفزة الأسعار

النفط يتراجع مع ترقب محادثات السلام بين أوكرانيا وروسيا وتزايد الضغوط من وفرة المعروض

وقال مسؤول حكومي إن عمليات الحفر هتبدأ في يناير الجاي، بالتوازي مع شغل التنمية اللي الشركات بتعمله في الآبار اللي شغالة دلوقتي، وده كله بالمراجعة مع الهيئة المصرية العامة للبترول والشركة القابضة للغازات الطبيعية إيجاس.

وأشار إن مناطق امتياز الصحراء الغربية واخدة أكبر نصيب من خطط الحفر الخاصة بإنتاج النفط، حيث تم اعتماد برنامج حفر 16 بيرا استكشافية في الصحراء الغربية و3 آبار في خليج السويس خلال الفترة من يناير لحد مارس 2026.

وأضاف إن تركيز الحكومة كمان على استكشافات الغاز، وبيتم التجهيز لحفر 5 آبار استكشافية في المياه العميقة بالبحر المتوسط، وكمان بئرين في دلتا النيل خلال أول ربع من 2026، بهدف الوصول لحقول غاز جديدة ونقدر نحطها على خريطة الإنتاج قبل نهاية السنة المالية الحالية، مع الاستفادة من التسهيلات والبنية التحتية الموجودة في غرب دلتا النيل والبحر المتوسط.

ونروح لخبر مهم.. بيانات جديدة كشفت إن مبيعات العربيات في السوق المصري رجعت تعلى تاني خلال شهر أكتوبر اللي فات.

وبحسب بيانات مجلس معلومات سوق السيارات أميك، مبيعات العربيات في أكتوبر زادت بنسبة 6.8% على أساس شهري وسجلت 16.3 ألف عربية، مقارنة بـ15.2 ألف عربية في سبتمبر اللي فات.

وجاء التعافي ده بعد انخفاض 13.5% في سبتمبر، نازلة من 17.6 ألف وحدة كانت مباعين في أغسطس اللي قبله.

ومبيعات الأوتوبيسات كانت صاحبة أكبر قفزة في أكتوبر، حيث زادت بنسبة 14.2% ووصلت لـ1200 وحدة. وفي نفس الوقت، مبيعات الشاحنات طلعت 11.9% لـ2500 وحدة.

أما مبيعات الملاكي فزادت 5.2% على أساس شهري ووصلت لـ12.6 ألف عربية.

ونروح لمجلس الوزراء.. حيث افتتح رئيس الوزراء مصطفى مدبولي، النهارده، مصنع شركة ليوني لتصنيع الضفاير الكهربائية للعربيات، واللي اتبنى في مدينة بدر على مساحة 14 ألف متر مربع.

وأكد مدبولي بعد الافتتاح، إن صناعة العربيات بقت أولوية قصوى للدولة المصرية، وعشان كده الحكومة بتبذل مجهود كبير لتوطين الصناعة دي ضمن خطة أكبر لتوطين الصناعات عمومًا، وجذب استثمارات أجنبية مباشرة في القطاع ده، من خلال تيسير إقامة ونمو المشروعات الصناعية اللي ليها قيمة مضافة عالية، خصوصًا في صناعة مكونات العربيات.

وأوضح مدبولي إن مصر بقت مركز عالمي لصناعة الضفاير الكهربائية، وبتضم أكبر الشركات المتخصصة في المجال ده، اللي بتنتج مكونات لكل أنواع العربيات سواء التقليدية أو الكهربائية.

ونختم بخبر من غرفة الصناعات الكيماوية والأسمدة، حيث أعلن رئيسها خالد أبو المكارم إن المستهدف تحقيق صادرات بـ11 مليار دولار السنة الجاية، بزيادة 15% عن السنة دي.

وأشار إن الصادرات قفزت بنسبة 12% بنهاية السنة الحالية ووصلت لـ9.5 مليار دولار، رغم أزمة الغاز اللي حصلت في مايو ويونيو واللي خلت بعض المصانع تقلل التشغيل لنحو 70%.

وعزى زيادة الصادرات للطلب الكبير على البلاستيك والبتروكيماويات والأسمدة، وأوضح إن إيطاليا تصدرت الدول اللي بتستورد منتجات الصناعات الكيماوية السنة دي بعد ما تركيا كانت في المركز الأول لسنين طويلة، وكمان الأسمدة بتمثل 30% من حجم صادرات الصناعات الكيماوية.

facebook

twitter

whats

• الغاز
• إنتاج الغاز
• مبيعات السيارات
• وزارة البترول
• اسعار الذهب