مصر بقت واحدة من أهم الدول اللي بتصدر الخيول العربية الأصيلة للعالم، ومع التطوير الكبير لمحطات التربية، خاصة محطة الزهراء، بقت الخيول المصرية دلوقتي تدخل الأسواق الدولية بقوة وتحقق قيمة اقتصادية وثقافية كبيرة، بالإضافة لدورها في الحفاظ على التراث العربي الأصيل.

الخيول العربية المصرية مش بس حيوانات، ده إرث وكنز وطني بيتم تربيته ورعايته بعناية كبيرة.

مصر تعيد تصدير الخيل العربي الأصيل.. الأردن البداية

وزير الزراعة يعلن إعادة فتح السوق الأردني أمام صادرات مصر من الخيول العربية الأصلية

محطة الزهراء تعتبر قلب هذا الإرث، وبتضم أكبر عدد من الخيول النقية في مصر، وبتشرف على مزارع ومحطات في كل أنحاء البلاد.

هنا بيتم التركيز على 5 سلالات مميزة، كل واحدة ليها تاريخ وأهمية كبيرة:

الصقلاوية: معروفة بجمالها وأناقتها، راسها صغير وملامحها ناعمة، عنقها طويل، ورشاقتها وسرعتها بتخليها من أجمل الخيول.

اما الدهمانية: قوتها وصلابتها واضحة، جسمها متناسق وأرجلها قوية، لونها غالبًا داكن، وهي مميزة عن باقي السلالات.

والكحيلانية: من أقدم السلالات، جسم عضلي ورأس مستقيم، قوية وسريعة، وتحمل المسافات الطويلة.

نيجي بقى ل العبيانية: اللي بتكون متوسطة الحجم، متوازنة بين القوة والرشاقة، نشيطة وحيوية، كانت تستخدم في الغزوات والرحلات الطويلة.

واخيرا الهدبانية: ضخمة وقوية جسديًا، رأسها قوي وعنقها قصير، شجاعة ومقدرة على التحمل، كانت مفضلة في الحروب وحمل الفرسان لمسافات طويلة.

مؤخرًا، مصر بدأت تصدر الخيول المصرية للأردن بعد توقيع اتفاقيات رسمية بين البلدين، وده بيفتح مجال أكبر للتصدير للعالم كله… والتعاون ده مش بس بيعزز التجارة، لكنه كمان بيخلي مصر محطة رئيسية لتطوير الخيول العربية والحفاظ على سلالاتها الأصيلة.

والاستفادة من التصدير مش مالية بس، لكن كمان ثقافية وسياحية ورياضية، لأن الخيول المصرية بتشارك في بطولات ومعارض دولية، وبتجذب عشاق الفروسية من كل أنحاء العالم.

كمان الموضوع بيحفز الاستثمارات، سواء في المزارع أو محطات الرعاية البيطرية، وبيعزز قطاع الفروسية بشكل عام.

في النهاية، الخيول العربية المصرية دلوقتي مش بس جزء من تراثنا، لكنها كمان مصدر دخل مهم، فرصة استثمارية، وجسر بين مصر وبقية العالم.

السلالات النادرة دي مش بس جمال وقوة، لكن كمان رمز لفخرنا العربي والأصيل، وبتأكد إن مصر هتفضل دايمًا في قلب صناعة الفروسية العالمية.

facebook

twitter

whats

• الخيول المصرية
• الأسواق العالمية
• أجمل خيول الأرض
• الخيول العربية الأصيلة
• الصقلاوية
• الدهمانية
• الكحيلانية