هو ايه اللي بيحصل في سوق الدهب؟ وليه الأسعار مش ثابتة وبتطلع وتنزل بسرعة؟ وهل اللي بيحصل ده ليه علاقة مباشرة بقرار الفيدرالي الامريكي المتوقع في يناير ولا لا؟ وهل احنا قدام موجة صعود جديدة ولا السوق داخل على مرحلة هدوء مؤقتة؟

سوق الدهب العالمي عايش حالة استثنائية من التقلبات وده باين بوضوح من حركة المعادن النفيسة كلها مش الدهب بس وده اللي شفناه مع الفضة اللي قفزت بشكل عنيف في بداية تعاملات الأسبوع وحققت مكاسب كبيرة من بداية السنة وبعدها مباشرة حصل تراجع قوي في نفس الجلسة في حركة سريعة جدا بتعكس قد ايه السوق متوتر وقد ايه المستثمرين بيتحركوا بحساسية شديدة مع اي خبر او توقع جديد.

آخر تحديث لأسعار الذهب في الأسواق المصرية اليوم الثلاثاء 30 ديسمبر

البنك المركزي المصري وأفريكسيم بنك يطلقان مشروع بنك الذهب الإفريقي

الدهب نفسه مر بنفس السيناريو تقريبا هبوط حاد وبعدين ارتداد سريع وده معناه ان في قوى شد وجذب واضحة في السوق في ناس بتبيع وناس بتشتري وكل طرف عنده حساباته والسبب الرئيسي في ده هو حالة عدم اليقين اللي مسيطرة على الاقتصاد العالمي كله من تضخم لتباطؤ نمو لتوترات جيوسياسية ولسه فوق كل ده ترقب قرارات السياسة النقدية الامريكية.

الفيدرالي الامريكي بقى لاعب اساسي في حركة الدهب خلال الفترة دي والتوقعات حوالين قرار يناير هي كلمة السر الاسواق بقالها فترة طويلة بتراهن على خفض الفايدة او على الاقل تغيير لهجة التشديد النقدي وده لو حصل بيكون في صالح الدهب لان الفايدة لما تقل تكلفة الاحتفاظ بالدهب بتبقى اقل والدولار بيضعف نسبيا وساعتها الدهب يبقى اكتر جاذبية للمستثمرين خصوصا اللي بيدوروا على ملاذ امن.

لكن في نفس الوقت في سيناريو تاني موجود بقوة وهو ان الاقتصاد العالمي ممكن يشهد تحسن نسبي في الفترة الجاية ولو ده حصل المعادن النفيسة ممكن تفقد جزء من جاذبيتها الدفاعية لان المستثمرين ساعتها يروحوا لاصول اعلى مخاطرة واعلى عائد وده يخلي حركة الدهب متذبذبة مش صعود مستمر.

عامل تاني مهم هو العرض والطلب خصوصا في الفضة اللي ليها استخدامات صناعية كبيرة جدا في الطاقة الشمسية والالكترونيات ومراكز البيانات والسيارات الكهربائية واي قيود على التصدير او مشاكل في سلاسل الامداد بتعمل قفزات سريعة في الأسعار وده اللي شفناه مع التحذيرات من قيود صينية محتملة على تصدير الفضة واللي زودت حالة القلق في السوق.

كل العوامل دي بتتحط مع بعض وتطلع لنا مشهد معقد شوية لكنه مفهوم لو ركزنا الدهب مش طالع وخلاص ولا نازل وخلاص هو بيتحرك بناء على توقعات الفايدة حركة الدولار حالة الاقتصاد العالمي ومستوى المخاطر في العالم ومع اقتراب يناير وترقب قرار الفيدرالي التذبذب هيبقى سيد الموقف واللي بيتعامل مع السوق لازم يكون فاهم ان المرحلة دي محتاجة هدوء وقراءة كويسة للمشهد مش اندفاع ورا الحركة السريعة لان الدهب دلوقتي بيتحرك على خبر وتوقع مش على اساس واحد ثابت.

facebook

twitter

whats

• الدهب
• سوق الدهب
• أسعار المعدن النفيس
• الفيدرالي الأمريكي
• سوق الدهب العالمي
• الاقتصاد العالمى
• التشديد النقدي
• الطاقة الشمسية