هو ايه حكاية اتفاقية التجارة الحرة اللي مصر وقطر بيتكلموا عنها؟ وليه فجأة الملف ده اتحط على طاولة المفاوضات بقوة؟ وهل الاتفاق  فعلا ممكن ينقل العلاقات الاقتصادية بين البلدين لمستوى تاني خالص.  وإزاي التقارب المصري القطري ده ممكن يدخل لمصر مليارات دولارات في وقت قصير؟

مصر وقطر بيدرسوا بجدية توقيع اتفاقية تجارة حرة وده معناه إزالة عوائق كتير قدام التبادل التجاري وتسهيل حركة السلع والاستثمارات بين البلدين..و الاتفاقية لو تمت هتكون نقطة تحول كبيرة لأن الأرقام الحالية للتجارة بين البلدين رغم نموها لسه أقل بكتير من الإمكانيات الحقيقية.

مصر تستعرض مشاريعها الكبرى في رأس الحكمة وعلم الروم بالتعاون مع الإمارات وقطر

متحدث الوزراء: إعلان تفاصيل صفقة استثمارية كبرى بين مصر وقطر قريبا

وزير الدولة لشؤون التجارة الخارجية القطري قال بوضوح إن حجم التجارة بين القاهرة والدوحة وصل حوالي 221 مليون دولار السنة اللي فاتت بزيادة أكتر من 54% وده رقم بيعكس تسارع واضح لكن في نفس الوقت بيعكس إن القاعدة لسه صغيرة وقابلة تتضاعف بسهولة.

من الجانب المصري الأرقام أكتر وضوحا..  التبادل التجاري قفز من حوالي 80 مليون دولار في 2023  لـ 143  مليون دولار في أول 10 شهور من 2025  يعني نمو قريب من 80% وده بيقول إن الاتجاه صاعد بقوة.

الأهم إن مصر مش بس عايزة تزود التجارة وخلاص لا دي مستهدفة تضاعف صادراتها لقطر 100% خلال سنتين وتوصل لـ 160 مليون دولار بعد ما كانت حوالى 130 مليون وده هييجي من قطاعات حيوية زي الصناعات الغذائية والكيماويات والصناعات الهندسية وقطع غيار السيارات يعني قطاعات بتشغل مصانع وبتخلق فرص عمل وبتدخل عملة صعبة.

وهنا تيجي النقطة الأهم ليه قطر مهتمة بمصر؟ وليه السوق المصري مغري بالنسبة لها؟

لأن مصر بالنسبة للشركات القطرية مش بس سوق كبير لكن كمان بوابة دخول لأفريقيا وأوروبا بسبب اتفاقيات التجارة الحرة اللي مصر مرتبطة بيها وده بيخلي الاستثمار في مصر استثمار إقليمي مش محلي بس.

التقارب ده ظهر بشكل عملي مش مجرد كلام لما شركة الديار القطرية وقعت اتفاق ضخم مع هيئة المجتمعات العمرانية الجديدة باستثمار يقرب من تلاتين مليار دولار في مشروع علم الروم بالساحل الشمالي وده واحد من أكبر الاستثمارات القطرية في تاريخ السوق المصري.

المشروع مش بس سياحي لكن متكامل وهيشمل فنادق ومولات ومشاريع اجتماعية وهيعتمد بنسبة كبيرة على شركات مقاولات مصرية وموردين محليين وده معناه ضخ مباشر للسيولة في السوق وتشغيل آلاف العمال وتحريك سلاسل توريد كاملة.

غير مشروع علم الروم الاستثمارات القطرية الحالية في مصر وصلت لحوالي خمسة وسبعة من عشرة مليار دولار وده رقم مرشح يزيد بقوة مع توقيع اتفاقية التجارة الحرة لأن الاتفاقيات من النوع ده بتدي المستثمر ثقة أكبر واستقرار تشريعي أوضح.

الوزارات في البلدين بدأت تتكلم كمان عن مشروعات تكاملية يعني مش بس استثمار مباشر لكن تصنيع مشترك وتعظيم قيمة مضافة في صناعات زي الألومنيوم والسيارات والمنسوجات ودي صناعات لو دخل فيها رأس المال القطري مع الخبرة والسوق المصري ممكن تعمل طفرة حقيقية.

الفرص المطروحة على الطاولة أرقامها بتتكلم عن نفسها مصنع وقود مستدام للطائرات باستثمار ميت مليون دولار في اقتصادية قناة السويس وفنادق سياحية بخمسين مليون دولار ومشاريع زراعية ودواجن بأربعمية مليون دولار ومصنع لتصنيع رؤوس آبار بنص مليار دولار ده غير عرض مصر إقامة منطقة صناعية قطرية متكاملة في العلمين جنب مشروع علم الروم.

كمان في أكتر من خمسة آلاف شركة مصرية قطرية شغالة بالفعل في قطر وده معناه إن العلاقات الاقتصادية مش جديدة لكنها محتاجة إطار أكبر ينظمها ويوسعها وده اللي اتفاقية التجارة الحرة هتعمله.

facebook

twitter

whats

• مصر وقطر
• العلاقات الاقتصادية
• التقارب المصري القطري
• التبادل التجاري
• حجم التجارة بين القاهرة والدوحة
• قطع غيار السيارات
• الصناعات الغذائية
• اتفاقية التجارة الحرة