ليه الصين اختارت مصر تحديدًا علشان توسع استثماراتها؟، وإيه سر وجود أكتر من 2800 شركة صينية شغالة في مصر؟ وهل الاستثمارات الصينية مجرد تجارة، ولا جزء من تحالف استراتيجي أعمق؟، والصين بتصرف مليارات في مجالات جديدة زي الفضاء والسيارات الكهربائية.. ليه دلوقتي؟، وهل موقع مصر على طريق الحزام والطريق هو السبب الحقيقي ورا الاندفاع الصيني؟، ومصر هتكسب إيه لما الاستثمارات الصينية توصل لـ16 مليار دولار في 4 سنين؟

في السنين الأخيرة بقى فيه سؤال شاغل ناس كتير، ليه الصين مركزة استثماراتها في مصر بشكل ضخم؟.. وليه بنسمع إن فيه أكتر من 2800 شركة صينية شغالة رسمي في البلد؟ القصة مش صدفة، ده شغل مدروس ومبني على مصالح استراتيجية للطرفين.

مصر والصين تتعاونان لتطوير شبكات الكهرباء الذكية ومشروعات الضخ والتخزين الكهرومائية

مصر والصين بيجهزوا لحاجة كبيرة.. عودة قوية للجنيه.. وودائع الدولار تسجل رقما تاريخيا

من الآخر كده، العلاقات بين مصر والصين بقت ثابتة وراسخة، وده مش كلام دبلوماسي، المسؤولة الصينية ليو يونغ فنغ قالت إن العلاقات “قادرة على الصمود قدام أي متغيرات دولية”، خصوصًا بعد اللقاءات الكتير اللي جمعت الرئيس السيسي بالرئيس الصيني شي جين بينغ، واللي عملت نقلة كبيرة في التعاون بين البلدين.

السنة الجاية كمان هيعدي 70 سنة على العلاقات الدبلوماسية بين القاهرة وبكين، وده في السياسة رقم مش بسيط، لأنه معناه إن التعاون بين الدولتين مش وليد اللحظة، ده مبني على تاريخ طويل وثقة.

الصين النهارده عندها استثمارات في مصر تقريبا 7–8 مليارات دولار، وبتوفر حوالي 5000 فرصة عمل للمصريين، والأهم أن مصر مستهدفة تزود الرقم ده لـ 16 مليار دولار خلال 4 سنين بس، ده غير أن مصر عايزة تجيب استثمارات جديدة بنهاية السنة بقيمة 15 مليار دولار.

طب الصين بتستثمر في إيه؟.. القائمة طويلة جدًا، أبرزها الزراعة والطاقة الإنتاجية والفضاء والسيارات الكهربائية والطاقة الجديدة والمتجددة والاقتصاد الرقمي والبنية التحتية والتكنولوجيا وصناعة الأجهزة الكهربائية والتصنيع داخل المنطقة الاقتصادية لقناة السويس.

وده غير المشاريع العملاقة زي تيدا في محور قناة السويس، وشركات زي هايير وميديا اللي بقت بتصنع وتصدر من مصر.

طيب ليه مصر بالتحديد؟.. بكل بساطة، مصر بالنسبة للصين محور استراتيجي وموقع جغرافي رهيب على 3 قارات، قناة السويس على خط الحزام والطريق، وبنية تحتية بتتطور بسرعة، ومدن جديدة وشبكات طرق وموانئ حديثة.

غير كده، عندنا عمالة شابة وأجور تنافسية، واتفاقيات تجارة حرة بتفتح أبواب لأسواق بأكتر من 70 دولة.

الصين كمان شايفة إن مبادرتها “الحزام والطريق” ماشية مع رؤية مصر 2030 خطوة بخطوة.. والصينيين معتمدين أن مصر ممكن تبقى مركز صناعي وتصديري يخدم إفريقيا والشرق الأوسط وأوروبا، وده السبب إنهم بيضخوا مليارات في العاصمة الإدارية والعلمين الجديدة والقطار الكهربائي.

وفي البريكس، التنسيق بين مصر والصين واضح جدًا، خصوصًا في الطاقة والتكنولوجيا والمعادن.. يعني من الآخر، الصين مش بتستثمر في مصر صدفة، ده جزء من تحالف اقتصادي وسياسي واستراتيجي بيكبر كل يوم.. ومع وجود أكتر من 2800 شركة صينية شغّالة، ومع خطط لمضاعفة الاستثمارات، مصر رايحة لمرحلة شراكة أكبر بكتير.

facebook

twitter

whats

• الصين
• السيارات الكهربائية
• الاستثمارات الصينية
• الفضاء
• التعاون التجاري بين مصر والصين