غاز طبيعي مكتشف باحتياطيات ضخمة في أعماق البحر المتوسط.. هيبدأ قريب رحلة طويلة من تحت الميّة، وهتنتهي في مصر، وتحديدًا في دمياط وبورسعيد، قبل ما يكمل طريقه لأوروبا.

قصة ممكن تغيّر خريطة الطاقة في شرق المتوسط بالكامل.. طب  إزاي؟ وليه مصر؟ وليه دلوقتي؟.. والغاز ده جاي من فين.. ده اللي هنفهمه دلوقتي.

قبرص أعلنت إن جزء كبير من الغاز اللي لسه مكتشف عندها – واللي الاحتياطي الإجمالي في المياه القبرصية يوصل لـ 20 تريليون قدم مكعب – هيوصل لأوروبا سنة 2027.

سفيرة قبرص: شركاتنا تبدي رغبتها بالتعاون مع مصر في قطاع التعدين

اتفاق مصري قبرصي لنقل غاز حقل “كرونوس” إلى البنية التحتية المصرية

والبداية من حقل مهم جدًا اسمه كرونوس… اللي بتطوره شركتين تقال: إيني الإيطالية وتوتال إنرجيز الفرنسية.

الرئيس القبرصي قالها صريحة: قبرص جزء من حل أزمة الطاقة الأوروبية، ومفيش طريق أسرع ولا  أمن لتصدير الغاز غير إنه يمر من مصر.

طب ليه مصر؟ لأن مصر هي الدولة الوحيدة في شرق المتوسط اللي عندها محطات إسالة جاهزة، وتشغيل كامل، ومربوطة بشبكة خطوط عملاقة أهمهم خط حقل ظهر العملاق.

الخطة الجديدة بتقول إن غاز حقل كرونوس هيتسحب من قبرص، ويتربط مباشرة بالبنية التحتية بتاعة حقل ظهر المصري.

ومن هناك، يتنقل على محطة المعالجة في دمياط يتسيّل ويتصدر على أوروبا.
وده اللي اتّفقوا عليه رسميًا في القاهرة، لما مصر وقبرص وقّعوا مذكرة تفاهم كبيرة مع إيني وتوتال، واتّفقوا كمان على تعريفة المعالجة والنقل مع شركة إيجاس المصرية.

طب كميات الغاز اللي جاية على مصر قد إيه؟

الأرقام هنا مهمة جدًا..  في البداية، من حقل كرونوس بس، متوقع يوصل لمصر حوالي: 400  مليون قدم مكعب يوميًا في 2027.

بعد كده، مع إضافة غاز حقل أفروديت القبرصي – اللي هيتربط هو كمان بمصر  الكمية هتعلى لـ 800 – 900 مليون قدم مكعب يوميًا.

وبعد التوسعات: الهدف الكبير 1.3 مليار قدم مكعب يوميًا قبل نهاية 2028.

طب إيه علاقة دمياط وبورسعيد بالموضوع؟
دور دمياط واضح محطة الإسالة هناك جاهزة تشتغل فورًا،  لكن الجديد  إن بورسعيد كمان في قلب المشروع: جزء من الغاز القبرصي – خصوصًا أفروديت – هيتعالج على منشأة قُريبة من بورسعيد.

وبعد كده مصر تقرر: هل هنستخدمه محلي؟..  ولا هنسيله ونصدره لأوروبا؟
الاتنين مطروحين… وده اللي بتناقشه مصر مع قبرص وشركات التشغيل حاليًا
الموضوع مش غاز بس.. ده سياسة وتقوية نفوذ.. أوروبا بتحاول تقلل اعتمادها على غاز روسيا  وقبرص محتاجة ممر آمن، ومصر عندها البنية التحتية، والموقع، ومحطات الإسالة.. ومعاه بلدنا بتتحول بشكل رسمي لـ مركز الطاقة الرئيسي في شرق المتوسط.

اللي جاي أكبر شركات زي إكسون موبيل وقطر للطاقة واخدين تراخيص استكشاف في بلوكات جديدة قبالة الساحل القبرصي، وفي اكتشافات زي جلاوكوس وبيجاسوس، كل ده معناه إن خط الغاز اللي ماشي على مصر لسه في أول المشوار.

facebook

twitter

whats

• كرونوس
• الطاقة
• شرق المتوسط
• مصر وقبرص
• حقل كرونوس