في تصريح هز السوشيال ميديا.. رجل الأعمال نجيب ساويرس قال إن الحد الأدنى الحقيقي اللي يمكن المواطن يعيش بكرامة لازم يكون بين 14 لـ15 ألف جنيه.

رقم كبير.. لكن ساويرس شايف إنه هو ده اللي يناسب مستوى الأسعار وتكاليف المعيشة دلوقتي.

التصريح جه وسط مطالبات كتير برفع الدخول، ومع زيادة كل حاجة حوالينا، بقى السؤال: هل فعلاً الأجر الحالي كفاية؟

ساويرس اتكلم كمان عن مؤسسة ساويرس للتنمية، وقال إن ميزانيتها السنوية بتوصل لمليار جنيه
وإن كل إخوته بيدفعوا حصتهم بانتظام، وهو الوحيد اللي بيطول شوية لدرجة إنهم بيضغطوا عليه علشان يزود مساهمته!

ومن الناحية التانية.. ثروة ساويرس نفسها عاملها قفزة كبيرة السنة دي.
الراجل رجع تاني يبقى أغنى شخص في مصر، بعد ما تخطى ثروة أخوه ناصف، ووصلت ثروته لأكتر من 9.23 مليار دولار.

وبحسب مؤشر بلومبرج.. ساويرس زود ثروته 2.35 مليار دولار من بداية السنة بس!

وتصريحات ساويرس القديمة بتقول إنه واحد من أكبر المستثمرين في الذهب في العالم.

ومع ارتفاع جاذبية الذهب الفترة الأخيرة.. واضح إن استثماراته ضربت فوق.

في النهاية.. ما بين دعوته لرفع الأجور وصعود ثروته.. ساويرس بيفتح باب نقاش كبير عن المعيشة والدخل واللي محتاجينه فعلاً علشان المواطن يعيش حياة محترمة.

facebook

twitter

whats

• ساويرس
• نجيب ساويرس
• الحد الادنى للاجور
• مؤسسة ساويرس للتنمية